ក្រសួងអប់រំ យុវជន និងកីឡា បាន និងកំពុងពង្រឹងគុណភាពអប់រំតាមរយៈការបន្ស៊ីប្រព័ន្ធអប់រំឱ្យ ស្របតាមនិន្នាការអប់រំថ្នាក់តំបន់ និងសាកលលោកដោយសង្កត់ធ្ងន់លើការអភិវឌ្ឍប្រកបដោយចីរភាព និងយុទ្ធសាស្ត្របញ្ចកោណដំណាក់កាលទី១ ដើម្បីកំណើនការងារសមធម៌ ប្រសិទ្ធភាព និងចីរភាព។ យុទ្ធសាស្ត្រនេះមានគោលបំណងកសាងមូលដ្ឋានគ្រឹះឆ្ពោះទៅសម្រេចបានចក្ខុវិស័យកម្ពុជាឆ្នាំ២០៥០។ ដើម្បីសម្រេចបានគោលដៅខាងលើ ក្រសួងអប់រំ យុវជន និងកីឡា មានគោលបំណងធានាឱ្យប្រជាពលរដ្ឋកម្ពុជាទាំងអស់ទទួលបានការអប់រំប្រកបដោយសមធម៌ និងបរិយាបន្ន ជាមួយនឹងចំណេះដឹង ជំនាញ និងគុណតម្លៃ ដែលនាំឱ្យមានសុភាពល្អ កាយសម្បទា និងការសិក្សាពេញមួយជីវិត។
ក្នុងន័យនេះ ក្រសួងអប់រំ យុវជន និងកីឡា បានយកចិត្តទុកដាក់លើការពង្រឹងគុណភាពគ្រូបង្រៀន ដោយចាត់ទុកថា គ្រូបង្រៀននៅកម្ពុជាត្រូវទទួលបានការជឿទុកចិត្ត និងការទទួលស្គាល់ថាជាអ្នកផលិតចំណេះដឹង អ្នកអនុវត្តពិតប្រាកដនៅកម្រិតសាលារៀន និងជាដៃគូសម្រាប់កែលម្អគោលនយោបាយ។ ដើម្បីសម្រេចបាននូវគោលដៅនេះ ក្រសួងអប់រំ យុវជន និងកីឡា បាន និងកំពុងធ្វើកំណែទម្រង់គ្រឹះស្ថានបណ្ដុះបណ្ដាលគ្រូ ដោយផ្តោតលើចំណុចសំខាន់ៗដូចតទៅ៖
- ការកែលម្អកម្មវិធីបណ្ដុះបណ្ដាល និងវិក្រឹតការគ្រូ
- ការអភិវឌ្ឍសមត្ថភាពវិជ្ជាជីវៈគ្រូឧទ្ទេសខាងផ្នែកខ្លឹមសារមេរៀន គរុកោសល្យ និងវិធីសាស្ត្របង្រៀនសម្បូរបែប និងការប្រើប្រាស់បច្ចេកវិទ្យាក្នុងការបង្រៀន
- ការអភិវឌ្ឍហេដ្ឋារចនាសម្ព័ន្ធស្របតាមបច្ចេកវិទ្យាថ្មីៗ បណ្ណាល័យ និងសម្ភារឧបទេសទំនើបសម្បូរបែប
- ការអភិវឌ្ឍភាពជាអ្នកដឹកនាំ និងគ្រប់គ្រង
- ការផ្សាភ្ជាប់ទ្រឹស្ដីទៅនឹងការអនុវត្តកម្មវិធីសិក្សាគរុកោសល្យ
- ការធានាគុណភាពនៃការបណ្ដុះបណ្ដាល