ការប្រែក្លាយមជ្ឈមណ្ឌលគរុកោសល្យភូមិភាគ និងសាលាគរុកោសល្យ និងវិក្រឹតការខេត្តកំពង់ចាម ទៅជាវិទ្យាស្ថានគរុកោសល្យកំពង់ចាម
រាជធានីភ្នំពេញ៖ នៅថ្ងៃទី២៦ និងថ្ងៃទី២៨ ខែមករា ឆ្នាំ២០២៦ ក្រសួងអប់រំ យុវជន និងកីឡា បានរៀបចំកិច្ចប្រជុំ និងកិច្ចពិភាក្សាជាមួយប្រតិភូនៃទីភ្នាក់ងារសហប្រតិបត្តិការជប៉ុន (JICA) ពាក់ព័ន្ធនឹងគម្រោង “ការប្រែក្លាយមជ្ឈមណ្ឌលគរុកោសល្យភូមិភាគ និងសាលាគរុកោសល្យ និងវិក្រឹតការខេត្តកំពង់ចាម ទៅជាវិទ្យាស្ថានគរុកោសល្យកំពង់ចាម”។
នាព្រឹកថ្ងៃពុធ ១០កើត ខែមាឃ ឆ្នាំម្សាញ់ ពុទ្ធសករាជ ២៥៦៩ ត្រូវនឹងថ្ងៃទី២៨ ខែមករា ឆ្នាំ២០២៦ លោកជំទាវបណ្ឌិត ឃួន វិច្ឆិកា អគ្គនាយក នៃអគ្គនាយកដ្ឋានបណ្តុះបណ្តាល និងវិក្រឹតការ បានដឹកនាំកិច្ចពិភាក្សាបន្ថែមជាមួយប្រតិភូ JICA ដើម្បីពង្រឹងទិសដៅអនុវត្តគម្រោងដោយពិនិត្យលើ សូចនាករនៃគម្រោង លំហូរហិរញ្ញវត្ថុ ការងារបច្ចេកទេសសំណង់ ក្រុមការងារទទួលខុសត្រូវគម្រោង ថេរវេលាអនុវត្តគម្រោង។ គម្រោងនេះមានគោលបំណងធានាការអភិវឌ្ឍកម្មវិធីអប់រំគ្រូបង្រៀនតាមប្រព័ន្ធ ១២ បូក ៤ និងបរិញ្ញាបត្របូក ១ ស្របតាមទិសដៅកំណែទម្រង់វិស័យអប់រំ និងការកសាងសមត្ថភាពគ្រូបង្រៀនឱ្យមានគុណភាពខ្ពស់ សម្រាប់ឆ្លើយតបនឹងតម្រូវការអភិវឌ្ឍប្រទេសជាតិ។
២៨ មករា ២០២៦ | រាជធានីភ្នំពេញ
