វិទ្យាស្ថានជាតិអប់រំពិសេស

        វិទ្យាស្ថានជាតិអប់រំពិសេស គឺជាគ្រឹះស្ថានឧត្តមសិក្សារដ្ឋសំខាន់មួយដែលផ្តល់ការបណ្ដុះបណ្ដាលថ្នាក់បរិញ្ញាបត្រអប់រំវិជ្ជាជីវៈសម្រាប់គ្រូបង្រៀននៅកម្រិតបឋមសិក្សា និងមធ្យមសិក្សាបឋម
ភូមិ។ គ្រឹះស្ថាននេះមានតួនាទីដ៏សំខាន់ក្នុងការបណ្ដុះបណ្ដាលគ្រូបង្រៀនឱ្យមានគុណសម្បទាដែល
ឆ្លើយតបនឹងនិន្នាការបរិវត្តន៍ឌីជីថល និងតម្រូវការបច្ចុប្បន្ននៃវិស័យអប់រំក្នុងសតវត្សទី២១។

        វិទ្យាស្ថាននេះ គឺជាគ្រឹះស្ថានអប់រំគ្រូបង្រៀនមួយដ៏សំខាន់ក្នុងប្រទេសកម្ពុជាដែលមានបេសកកម្មជាក់លាក់ក្នុងការអប់រំ ការស្រាវជ្រាវ និងការផ្ដល់សេវាសហគមន៍។ វិទ្យាស្ថានផ្ដោតសំខាន់លើការផ្ដល់វគ្គសិក្សា និងការបណ្ដុះបណ្ដាលគ្រូបង្រៀនឆ្លើយតបតាមតម្រូវការអប់រំកម្រិតបឋមសិក្សា និងមធ្យមសិក្សាបឋមភូមិ។

         លោកជំទាវ នាង ផល្លា គឺជានាយកវិទ្យាស្ថានជាតិអប់រំពិសេស។ លោកជំទាវជាអ្នកដឹកនាំអប់រំមួយរូបដែលមានចក្ខុវិស័យ និងឆន្ទៈក្នុងការអភិវឌ្ឍវិស័យអប់រំ និងបានដឹកនាំវិទ្យាស្ថានស្របតាមចក្ខុវិស័យរបស់វិទ្យាស្ថាន គឺ "ជាគ្រឹះស្ថានអប់រំគ្រូបង្រៀនឈានមុខគេនៅសតវត្សទី២១”។

         ការដឹកនាំរបស់លោកជំទាវ មានលក្ខណៈប្រកបដោយនវានុវត្តន៍ក្នុងការគាំទ្រការកែលម្អវិស័យអប់រំ។ លោកជំទាវផ្ដោតសំខាន់ក្នុងការលើកកម្ពស់គុណភាពអប់រំ និងការបណ្ដុះបណ្ដាលគ្រូឧទ្ទេសឱ្យក្លាយជាគ្រូបង្រៀនដែលមានសមត្ថភាពឆ្លើយតបនឹងបរិវត្តកម្មឌីជីថលនាពេលបច្ចុប្បន្ននិងការអប់រំក្នុងសតវត្ស
ទី២១។