សាលាគរុកោសល្យ និងវិក្រឹតការ ហ៊ុន សែន ខេត្តកំពង់ធំ

• សាលាគរុកោសល្យ និងវិក្រឹតការ ហ៊ុន សែន ខេត្តកំពង់ធំ បានបង្កើតឡើងតាមសេចក្តីណែនាំលេខ ៧១៨/០៣មចខ/កធ​ ចុះថ្ងៃទី២៤ ខែមីនា ឆ្នាំ១៩៨០ របស់គណៈកម្មាធិការប្រជាជនបដិវត្តន៍ខេត្ត កំពង់ធំ តាមកាណែនាំរបស់ក្រសួងអប់រំ យុវជន និងកីឡា។ សាលានេះបានផ្លាស់ប្ដូរទីតាំង ៣ដងរួចមកហើយ។ លើកទី១នៅសាលាមត្តេយ្យ ស្ថិតនៅក្នុងទីរួមខេត្ត (គឺមន្ទីរអប់រំ បច្ចុប្បន្ន) ដោយសារតម្រូវការ បើកវគ្គបំប៉នសិក្ខាកាមជាគ្រូបឋមសិក្សា តាមរបៀបស្នាក់នៅអន្តេវាសិកដ្ឋានសាលាបានផ្លាស់ប្តូរទីតាំងចាស់ មកអតីតវិទ្យាល័យកំពង់ធំវិញ នៅខែកញ្ញា ឆ្នាំ១៩៨០។ អាស្រ័យដោយមានការរីកចម្រើនលើ វិស័យអប់រំនៅគ្រឹះស្ថានមធ្យមសិក្សា សាលាគរុកោសល្យបានផ្ទេរទីតាំងពីវិទ្យាល័យកំពង់ធំមកទីតាំងថ្មីគឺអតីតសាលាកម្រិតសិក្សាទី៣ ប្រចាំខេត្តនៅក្នុងឆ្នាំសិក្សា ១៩៩៣-១៩៩៤ រហូតមកដល់សព្វថ្ងៃ ដែលស្ថិតនៅក្នុងភូមិអាចារ្យលាក់ សង្កាត់អាចារ្យលាក់ ក្រុងស្ទឹងសែន ខេត្តកំពង់ធំ ស្ថិតតាមបណ្តោយផ្លូវជាតិលេខ ៦A មានចម្ងាយពីភ្នំពេញ ១៦៨គីឡូម៉ែត្រ មានផ្ទៃដីសរុប ៣៧,០៥០ម៉ែត្រការ៉េ។

• សាលាគរុកោសល្យ និងវិក្រឹតការ ហ៊ុន សែន ខេត្ត កំពង់ធំ បានចាប់កំណើតឡើងនៅថ្ងៃទី២៤ ខែមីនា ឆ្នាំ១៩៨០ ដែលមានសមាសភាពគណៈគ្រប់គ្រងសាលាចាប់តាំងពីពេលបង្កើតរហូតដល់បច្ចុប្បន្នមាន៖

  • ពីឆ្នាំ១៩៨០ដល់១៩៨២៖ លោក ជា ជឿន ជានាយក លោក អ៊ុក ទក់ ជានាយករង

  • ឆ្នាំ១៩៨១ លោក អ៊ុក ទក់ នាយករងបានផ្លាស់ទៅបំពេញភារកិច្ចនៅភ្នំពេញ។

  • ឆ្នាំ១៩៨២ លោកជា ជឿន ត្រូវបានមកជំនួស លោក ជួន ស៊ុនហួ ប្រធានមន្ទីអប់រំ យុវជន និងកីឡាខេត្តកំពង់ធំ ដែលត្រូវប្តូរតំណែងទៅជាប្រធានតុលាការ។

  • ឆ្នាំ១៩៨៣ លោក លុក សម្បត្តិ ត្រូវបានតែងតាំងជានាយក ក្នុងឆ្នាំដដែល​លោកលុកសម្បត្តិ​​ ត្រូវបានផ្លាស់ទៅបម្រើការនៅគណៈឃោសានាអប់រំខេត្ត។

  • ឆ្នាំ១៩៨៤ លោក សុង ងួន ជានាយក  លោក ឡាយ ថាន់ ជានាយករង លោក ឈុយ ប៉េង ជានាយករង។

  • ឆ្នាំ២០០៤ លោក ឈុយ ប៉េង នាយករង ចូលនិវត្តន៍ លោក ឡាយ ថាន់ ទៅបម្រើការនៅកម្មវិធីសិលា។

  • ឆ្នាំ២០០៥ លោក សុង ងួន ជានាយក ចូលនិវត្តន៍។

  • ឆ្នាំ ២០០៥ លោស្រី ងួន ផល្លី ជានាយិកា លោក ចែម ហុង ជាយករង លោក ហ៊ុយ ឃាង ជានាយករង។

  • ឆ្នាំ២០១៨ លោក ហ៊ុយ ឃាង ជានាយក លោក ចែម ហុង ជានាយរង លោកស្រី សុទ្ធ សុខនីនជានាយិការង រហូតដល់បច្ចុប្បន្ន។

កសាងគ្រូបង្រៀនឱ្យមានសមត្ថភាព មនសិការវិជ្ជាជីវៈ សីលធម៌ និងគុណធម៌ ដើម្បីរួមចំណែកអភិវឌ្ឍន៍វិស័យអប់រំប្រកបដោយគុណភាព និងប្រសិទ្ធភាព។

ដើម្បីសម្រេចបាននូវចក្ខុវិស័យគ្រឹះស្ថានអប់រំគ្រូបង្រៀនបានកំណត់បេសកកម្មចម្បងចំនួន ៣គឺ៖

• អប់រំគរុសិស្ស និងអភិវឌ្ឍសមត្ថភាពគ្រូបង្រៀនឱ្យមានគុណសម្បទាពេញលេញឆ្លើយតបបរិវត្តកម្មអប់រំ
• លើកកម្ពស់ការស្រាវជ្រាវអប់រំ ដើម្បីបង្កើនគុណភាពការបង្រៀន និងរៀន
• ផ្តល់សេវាដល់សហគមន៍ ដើម្បីចូលរួមចំណែកក្នុងការអភិវឌ្ឍសមត្ថភាពគ្រូបង្រៀន