សាលាគរុកោសល្យ និងវិក្រឹតការខេត្តកណ្តាល

សាលាគរុកោសល្យនិងវិក្រឹតការខេត្តកណ្តាល មានទីតាំងនៅតាមបណ្តោយផ្លូវជាតិលេខ ២១ A ស្របតាមសួនច្បារក្រុងតាខ្មៅ ស្ថិតក្នុងភូមិតាខ្មៅ១ សង្កាត់តាខ្មៅ ក្រុងតាខ្មៅ ខេត្តកណ្តាល ដែលមាន​ចម្ងាយ​​​​​ប្រមាណ ១១ គីឡូម៉ែត្រពីចំណុចកណ្តាលនៃរាជធានីភ្នំពេញ។ ចាប់តាំងពីពេលត្រូវបាន​សាងសង់​រួចនៅ​ឆ្នាំ​១៩៦០មក សាលា​ត្រូវបានប្រើប្រាស់ជាកន្លែងផ្តល់សេវាផ្សេងៗតាមសម័យកាលដូចខាង​ក្រោម៖

• ពីឆ្នាំ ១៩៦០ ដល់ឆ្នាំ ១៩៧០  ជាអនុវិទ្យាល័យរាស្ត្រនិយមព្រះសីហនុ និងសាលាបឋមសិក្សាតាខ្មៅ
• ពីឆ្នាំ ១៩៧០ ដល់ឆ្នាំ ១៩៧៥  ជាវិទ្យាល័យតាខ្មៅ និងសាលាបឋមសិក្សាតាខ្មៅ
• ពីឆ្នាំ ១៩៧៥ ដល់ឆ្នាំ ១៩៧៩  ជាមន្ទីរពេទ្យនិងមន្ទីរឃុំឃាំងនៃរបបកម្ពុជាប្រជាធិបតេយ្យ
• ពីឆ្នាំ ១៩៧៩ ដល់ឆ្នាំ ១៩៨២  ជាសាលានយោបាយរបស់ឃោសនាអប់រំខេត្តកណ្ដាល
• ពីឆ្នាំ ១៩៨២ ដល់ឆ្នាំ ១៩៩៣  ជាមជ្ឈមណ្ឌលគរុកោសល្យភូមិភាគខេត្តកណ្ដាល​និង​សាលា​គរុកោសល្យនិងវិក្រឹតការខេត្តកណ្ដាល
• ពីឆ្នាំ ១៩៩៤ ដល់ឆ្នាំ ១៩៩៦   ជាមជ្ឈមណ្ឌលគរុកោសល្យភូមិភាគខេត្តកណ្ដាលនិងសាលា​គរុកោសល្យនិងវិក្រឹតការខេត្តកណ្ដាល និងសាលាបឋមសិក្សា​អនុវត្តន៍ខេត្តកណ្ដាល។
• ពីឆ្នាំ ១៩៩៦ ដល់បច្ចុប្បន្ន      ជាសាលាគរុកោសល្យនិងវិក្រឹតការខេត្តកណ្ដាល និងសាលា​បឋមសិក្សាអនុវត្តន៍ ប៊ុន រ៉ានី ហ៊ុន សែន ខេត្តកណ្តាល

កសាងគ្រូបង្រៀនឱ្យមានចំណេះដឹង ជំនាញ សីលធម៌ និងមានសមត្ថភាពអនុវត្តវិជ្ជាជីវៈដោយមានការទទួលស្គាល់ពីសង្គម។

ដើម្បីសម្រេចបាននូវចក្ខុវិស័យគ្រឹះស្ថានអប់រំគ្រូបង្រៀនបានកំណត់បេសកកម្មចម្បងចំនួន៣គឺ៖

• អប់រំគរុនិស្សិត និងអភិវឌ្ឍសមត្ថភាពគ្រូបង្រៀនឱ្យមានគុណសម្បទាពេញលេញឆ្លើយតបបរិវត្តកម្មអប់រំ

• លើកកម្ពស់ការស្រាវជ្រាវអប់រំ ដើម្បីបង្កើនគុណភាពការបង្រៀន និងរៀន

• ផ្តល់សេវាដល់សហគមន៍ ដើម្បីចូលរួមចំណែកក្នុងការអភិវឌ្ឍសមត្ថភាពគ្រូបង្រៀន