វិទ្យាស្ថានបច្ចេកវិទ្យាកម្ពុជា

វិទ្យា​ស្ថាន​បច្ចេក​វិទ្យា​កម្ពុជា​បង្កើត​ឡើង​នៅ​ឆ្នាំ​១៩៦៤ មាន​ឈ្មោះ​ថា វិទ្យា​ស្ថាន​បច្ចេក​ទេស​ជាន់​ខ្ពស់​មិត្ត​ភាព​កម្ពុជា​សូវៀត (Institut Technique Supérieur de l’Amitié Khméro-Soviétique: ITSAKS) ។ វិទ្យា​ស្ថាន​នេះ​ត្រូ​វ​បាន​​ផ្ដល់​ជំនួយ​ពី​សហភាព​សូវៀត​រហូត​ដល់​ឆ្នាំ ១៩៧៥ និង​ពី ១៩៨០ ដល់ ១៩៩១ ។ នៅ​ឆ្នាំ ១៩៩១ សូវៀត​បាន​បញ្ចប់​ជំនួយ​ទាំង​ស្រុង​ភ្លាមៗ​ដល់​វិទ្យាស្ថាន ។ នៅ​ឆ្នាំ​១៩៩៣ រដ្ឋាភិបាល​កម្ពុជា​និង​រដ្ឋាភិបាល​បារាំង​បាន​ចុះ​កិច្ច​ព្រម​ព្រៀង​គ្នា​ដើម្បី ​អភិវឌ្ឍ​វិទ្យាស្ថាន​បន្ត ដោយ​ប្តូរ​ឈ្មោះ​មក​ជា​វិទ្យា​ស្ថាន​បច្ចេក​វិទ្យា​កម្ពុជា ជា​ភាសា​បារាំង (Institut de Technologie du Cambodge: ITC) ។

វិទ្យាស្ថាន​បច្ចេកទេស​វិទ្យា​កម្ពុជា (ITC) ជា​គ្រឹះ​ស្ថាន​ឧត្តម​សិក្សា​កម្ពុជា ដែល​គ្រប់​គ្រង​ដោយ​ទី​ភ្នាក់​ងារ​ឧត្តម​សិក្សា​នៃ​ក្រុម​ប្រទេស​និយាយ​ភាសា​បារាំង (Agence Universitaire de la Francophonie: AUF) ពី​ឆ្នាំ ១៩៩៣ ដល់​ឆ្នាំ ២០០៤ នៅ​ក្នុង​ក្រប​ខ័ណ្ឌ​នៃ​ជំនួយ​ឧបត្ថម្ភ​ហិរញ្ញ​ប្បទាន​របស់​ប្រទេស​បារាំង (ក្រសួង​ការ​បរទេស​ និង​ស្ថាន​ទូតបារាំង) ។

វិទ្យាស្ថានបាន​ និងនឹងពង្រីកខ្លួនឲ្យទៅជាគ្រឹះស្ថានឧត្តមសិក្សាសាធារណៈលំដាប់អន្តរជាតិដែលមានការបណ្តុះបណ្តាលលើ ពហុជំនាញ ផ្តល់ការស្រាវជ្រាវវិទ្យាសាស្រ្ត និងនវានុវត្តន៍ជាអទិភាព បន្តផលិតធនធានមនុស្សប្រកបដោយគុណភាពខ្ពស់ក្នុងផ្នែកវិទ្យាសា ស្រ្ត និងបច្ចេកវិទ្យា ជាមជ្ឈមណ្ឌលសម្រាប់ផ្ទេរបច្ចេកវិទ្យា និងជំនាញដល់សហគមន៍ជាតិ និងបន្តពង្រីកកិច្ចសហប្រតិបត្តិការយ៉ាងទូលំទូលាយជាមួយដៃគូជាតិ និងអន្តរជាតិដើម្បីចូលរួមចំណែកក្នុងការអភិវឌ្ឍខឿនសេដ្ឋកិច្ចកម្ពុជា។

• ផ្តល់ការអប់រំលើផ្នែកវិទ្យាសាស្រ្ត និងបច្ចេកវិទ្យាប្រកបដោយគុណភាព និងសមធម៌ដើម្បីប្រែក្លាយជាអ្នកបច្ចេកទេសដែលមានក្រមសីលធម៌វិជ្ជាជីវៈខ្ពស់ សមត្ថភាព សហគ្រិនភាព ការឆ្នៃប្រឌិត នវានុវត្តន៍ គុណធម៌ សីលធម៌ មនសិការស្នេហាជាតិ ស្មារតីទទួលខុសត្រូវ និងយល់ដឹងអំពីសង្គម និងមានឆន្ទៈខ្ពស់ក្នុងការទទួលភារកិច្ចដើម្បីចូលរួមចំណែកក្នុងការអភិវឌ្ឍប្រទេស និង
• អភិវឌ្ឍការស្រាវជ្រាវវិទ្យាសាស្រ្ត ផ្ទេរបច្ចេកវិទ្យាដល់សហគមន៍ជាតិ ដើម្បីលើកស្ទួយសមត្ថភាពផលិតកម្ម និងសុខដុមនីយកម្ម។