សាលាមធ្យមសិក្សាគរុកោសល្យមត្តេយ្យមជ្ឈិម

សាលាមធ្យមសិក្សាគរុកោសល្យមត្តេយ្យមជ្ឈិម ស្ថិតនៅអគារលេខ២០១ មហាវិថីព្រះនរោត្តម ក្នុងសង្កាត់បេងកេងកង១ ខណ្ឌបឹងកេងកង រាជធានីភ្នំពេញ។

• ឆ្នាំ១៩៣០ ដល់ឆ្នាំ១៩៧៥ ជាអតីតសាលាបឋមសិក្សាចៅពញ្ញាហុក នាយកសាលាគឺលោក    វ៉ែន ឈុំ ។
• ឆ្នាំ១៩៧៥ ដល់ឆ្នាំ១៩៧៩ ក្នុងរបបប៉ុលពត សាលានេះត្រូវបិទទ្វារទាំងស្រុង។ ប៉ុលពត ប្រើប្រាស់សាលានេះជាកន្លែងបង្រៀនកម្មាភិបាលខ្មែរក្រហម។
• ឆ្នាំ១៩៧៩ ដល់ឆ្នាំ១៩៨៥ ក្រោយថ្ងៃរំដោះថ្ងៃទី៧ ខែមករា ឆ្នាំ១៩៧៩ ជាទីតាំងកងទ័ព និងជំនាញការវៀតណាម។
• ឆ្នាំ១៩៨៥ ក្រុមប្រឹក្សារដ្ឋមន្ត្រី នៃសាធារណរដ្ឋប្រជាមានិតកម្ពុជា ចុះហត្ថលេខាដោយ ឯកឧត្តមហ៊ុន សែនប្រធានក្រុមប្រឹក្សារដ្ឋមន្ត្រី បានរៀបចំបង្កើតសាលាមធ្យមសិក្សាគរុកោសល្យមត្តេយ្យ មជ្ឈិម តាមសេចក្តីសម្រេចលេខ ២០៦ ស.ស.រ ចុះថ្ងៃទី១១ ខែធ្នូ ឆ្នាំ១៩៨៥។
• ឆ្នាំ១៩៨៧ ចាប់ដំណើរការបណ្តុះបណ្តាលគ្រូមត្តេយ្យសិក្សាទូទាំងប្រទេសរហូតដល់បច្ចុប្បន្ន។
• ឆ្នាំ១៩៨៧ ដល់ឆ្នាំ១៩៩៣ ដឹកនាំដោយលោកជំទាវ រស់ម៉ាន ប៉ែនណាវុឌ ជាប្រធានគណៈគ្រប់គ្រងសាលា។
• ឆ្នាំ១៩៩៣ ដល់ ខែមីនា ឆ្នាំ២០១៧ ដឹកនាំដោយលោកស្រី ប្រាក់ សូលីដា ជានាយិកាសាលា ។
• ឆ្នាំ២០១៧ តាមប្រកាសលេខ ៣៣៨ អយក.ប្រក ចុះថ្ងៃទី២២ ខែមីនា ឆ្នាំ២០១៧ ដឹកនាំដោយលោក ប៉ាត់ គឹមនីន ជានាយកសាលារហូតដល់បច្ចុប្បន្ន។

កសាងគ្រូបង្រៀនឱ្យមានចំណេះដឹង ជំនាញ សីលធម៌ និងមានសមត្ថភាពអនុវត្តវិជ្ជាជីវៈដោយមានការទទួលស្គាល់ពីសង្គម។

ដើម្បីសម្រេចបាននូវចក្ខុវិស័យ គ្រឹះស្ថានអប់រំគ្រូបង្រៀនបានកំណត់បេសកកម្មចម្បងចំនួន៣គឺ៖

• អប់រំគរុសិស្ស-គរុនិស្សិត និងអភិវឌ្ឍសមត្ថភាពគ្រូបង្រៀនឱ្យមានគុណសម្បទាពេញលេញឆ្លើយតបបរិវត្តកម្មអប់រំ
• លើកកម្ពស់ការស្រាវជ្រាវអប់រំ ដើម្បីបង្កើនគុណភាព ការបង្រៀន និងរៀន
• ផ្តល់សេវាដល់សហគមន៍ ដើម្បីចូលរួមចំណែកក្នុងការអភិវឌ្ឍសមត្ថភាពគ្រូបង្រៀន។