សាលាគរុកោសល្យ និងវិក្រឹតការខេត្តតាកែវ

ក្រោយថ្ងៃរំដោះ៧ មករា ​ឆ្នាំ១៩៧៩ ប្រជាជនកម្ពុជាបានខិតខំប្រឹងប្រែងស្តារ និងអភិវឌ្ឍប្រទេសជាតិឡើងវិញ ពីគំនរផេះផង់ ដែលបន្សល់ទុកដោយរបបព្រៃផ្សៃប្រល័យពូជសាសន៍ ប៉ុល ពត ។ ធនធានមនុស្ស និងធនធានរូបវន្តនានា ត្រូវបានជំរុញកសាងយ៉ាងសកម្មដើម្បីបំពេញតម្រូវការជាបន្ទាន់របស់ប្រទេសជាតិ។

សកម្មភាពបានកើតឡើងយ៉ាងផុលផុសគ្រប់ទីកន្លែងទូទាំងប្រទេស។ គ្រូបង្រៀន អ្នកចេះដឹងដែលសេសសល់ពីការកាប់សម្លាប់ បានស្ទុះស្ទាចូលបម្រើវិស័យអប់រំវិញដោយគ្មានគិតពីប្រាក់កម្រៃ ប្រាក់ខែអ្វីទាំងអស់ គឺក្នុងបំណងចង់ឱ្យកុមារបានរៀនសូត្រ។ សាលារៀនជាច្រើនបានដំណើរការឡើងវិញ តែស្ថិតក្នុងសភាពដ៏សែនលំបាកក្រៃលែង។ សាលារៀនដំណើរការដោយគ្មានកម្មវិធីសិក្សា  ខ្វះថ្នាក់រៀន កន្លែងខ្លះមានបន្ទប់រៀនតែគ្មានតុ កៅអី ក្តារខៀន សៀវភៅ ខ្មៅដៃ ប៊ិក ដីសអ្វីទាំងអស់ គឺបាតដៃទទេសុទ្ធសាធ។ ប្រឈមនឹងបញ្ហានេះ ថ្នាក់ដឹកនាំក៏ដូចប្រជាជនកម្ពុជាទូទាំងប្រទេសបានប្រញាប់ប្រញាល់ ប្រមូលធនធានដែលមាននៅសេសសល់ និងជំរុញសកម្មភាពវិស័យអប់រំឱ្យមានដំណើរការឡើង។

សាលាគរុកោសល្យ និងវិក្រឹតការខេត្តតាកែវ ត្រូវបានបង្កើតនៅថ្ងៃទី១៦ ខែធ្នូ ឆ្នាំ១៩៧៩ ដើម្បីធ្វើវិក្រឹតការគ្រូបង្រៀនរយៈពេលខ្លី និងក្រោយមកទើបមានសេចក្តីសម្រេចឱ្យបណ្តុះបណ្តាលគ្រូបង្រៀនកម្រិតសិក្សាទី១ រយៈពេលវែងនៅឆ្នាំ១៩៨៣ (តាមសេចក្តីសម្រេចលេខ៤៨ សសរ ចុះថ្ងៃទី៦ ខែឧសភា ឆ្នាំ១៩៨៣ របស់ក្រុមប្រឹក្សារដ្ឋមន្ត្រី) សព្វថ្ងៃមានភារកិច្ចបណ្តុះបណ្តាលគ្រូបង្រៀនកម្រិតបឋមសិក្សា ១២+២

និងកំពុងត្រៀមខ្លួនបំពេញភារកិច្ចបណ្តុះបណ្តាលគ្រូបង្រៀនកម្រិតបឋមសិក្សា ១២+៤ បន្តទៀតផងដែរ។

សាលាគរុកោសល្យ និង វិក្រឹតការខេត្តតាកែវ ជាគ្រឹះស្ថានបណ្ដុះបណ្ដាលគ្រូបង្រៀនមានគុណភាព        ខ្ពស់។

ប្រែក្លាយសាលាគរុកោសល្យ និងវិក្រឹតការខេត្តតាកែវ ឱ្យក្លាយទៅជាមជ្ឈមណ្ឌលបណ្តុះបណ្ដាលគ្រូបឋមសិក្សាប្រកបដោយគុណភាព ប្រសិទ្ធភាព និងឧត្ដមភាព 

• ការរៀបចំសួននៅតាមមុខបន្ទប់រៀន នៅមុខទីចាត់ការ នៅអន្តេរវា

• អភិវឌ្ឍសមត្ថភាពបុគ្គលិកអប់រំតាមគ្រប់រូភាពលើកកម្ពស់ការងារស្វ័យសិក្សា និងស្រាវជ្រាវ។

• ពង្រឹងការងារដឹកនាំគ្រប់គ្រង។

• កែលម្អបរិស្ថានសាលា ទំនើបកម្មបច្ចេកវិទ្យា បម្រើឱ្យការបង្រៀន និង រៀន។

• បណ្ដុះបណ្ដាលធនធានគ្រូប្រកបដោយឧត្តមភាព។

• អភិវឌ្ឍសមត្ថភាពជាប្រចាំ ស្របតាមសម័យបច្ចេកវិទ្យាឌីជីថល ។