សាលាគរុកោសល្យ និងវិក្រឹតការខេត្តកំពង់ចាម

ទីកន្លែងសព្វថ្ងៃនេះ ពីដំបូងជាដីព្រៃដែលមានដើមឈើធំៗ លុះឆ្នាំ១៩៦៣ ក្នុងសម័យសង្គមរាស្ត្រនិយម។ទីកន្លែងនេះបានបង្កើតអាគារជាច្រើនខ្នង ដែលជាស្នាព្រះហស្ថរបស់ព្រះបាទសម្តេចនរោត្តមសីហនុ ដោយមានជំនួយពីបរទេស គឺប្រទេសចិន ហើយបានដាក់ឈ្មោះថា សាកលវិទ្យាល័យភូមិន្ទកំពង់ចាម ។ លុះពីឆ្នាំ១៩៧០ ដល់១៩៧៥ ប្រទេសកម្ពុជាបានជួបប្រទះសង្គ្រាមដែលបានធ្វើឱ្យកន្លែងនេះក្លាយទៅជា  សមរភូមិប្រយុទ្ធយ៉ាងខ្លាំង ធ្វើឱ្យអាគារទាំងអស់ខ្ទេចខ្ទីរស្ទើតែទាំងស្រុង ចំណែកដែលនៅសេសសល់គឺមានតែគ្រឹះអាគារ និងមានគ្រាប់បែកគ្រាប់មីនជាច្រើន ជាហេតុធ្វើឱ្យកន្លែងនេះទុកចោលរហូតដល់ឆ្នាំ១៩៧៩ ទើបគណកម្មាធិការខេត្តកំពង់ចាម បានប្រគល់ដី និងអាគារបែកបាក់ឱ្យមក សាលាគរុកោសល្យខេត្ត      កំពង់ចាម។ អាគារគ្មានដំបូលតែសាលាពុំមានលទ្ធភាពសាងសង់ និងជួសជុលឡើងវិញ រហូតមកដល់​ឆ្នាំ១៩៨៧ ទើបក្រសួងផ្តល់ថវិការរៀបចំជាបណ្តើរៗ បានចំនួន ៣អាគារ។ នៅឆ្នាំ១៩៩០ មានអង្គការ             រ៉េដបាណា មកជួយសាងសង់លើគ្រឹះចាស់ និងជួសជុលបន្ថែម ចំពោះអាគារទ្រុឌទ្រោម ដែលសាងសង់ ដោយក្រសួងអបរំ បានរួចរាល់ជាស្ថាពរនៅឆ្នាំ១៩៩៩ ដែលមានអាគារចំនួន ១២ខ្នង និងបង្គន់ ២កន្លែង។  ឆ្នាំ២០០៤ មានអង្គការ​JHP បានសាងសង់អាគារពីរជាន់ចំនួនមួយខ្នង និងបង្គន់អនាម័យចំនួន៣បន្ទប់។ ​ ឆ្នាំ២០០៦ អង្គការBETT បាន​សាងសង់អាគារស្នាក់នៅមួយខ្នង ២ជាន់ និងបង្គន់អនាម័យ ៨បន្ទប់​ បន្ទប់ទឹក ២បន្ទប់ និងជួសជុលអាគារចាស់ដែលទ្រុឌទ្រោមចំនួន១១ខ្នង បង្គន់អានាម័យ ២កន្លែងទៀត។​​​

បណ្តុះបណ្តាលគ្រូ​បង្រៀន​ឱ្យ​មាន​ចំណេះដឹង ជំនាញ សីលធម៌ និង​មាន​សមត្ថភាព​អនុវត្ត​វិជ្ជាជីវៈ​ដោយ​មាន​ការ​ទទួល​ស្គាល់​ពី​សង្គម​។ 

ដើម្បី​សម្រេច​បាន​នូវ​ចក្ខុវិស័យខាងលើ​ សាលា​បាន​កំណត់​បេសកកម្ម​ចម្បង​ចំនួន ​៣ ​គឺ​៖

• អប់រំ​គរុសិស្ស និង​អភិវឌ្ឍ​សមត្ថភាព​គ្រូ​បង្រៀន​ឱ្យ​មាន​គុណសម្បទា​ពេញលេញ​ឆ្លើយ​តប​បរិវត្ត​កម្មអប់រំ
• លើក​កម្ពស់​ការ​ស្រាវជ្រាវ​អប់រំ ដើម្បី​បង្កើន​គុណភាព​ការ​បង្រៀន និង​រៀន
• ផ្តល់​សេវា​ដល់​សហគមន៍ ដើម្បី​ចូលរួម​ចំណែក​ក្នុង​ការ​អភិវឌ្ឍ​សមត្ថភាព​គ្រូ​បង្រៀន