វិទ្យាស្ថានអប់រំកាយនិងកីឡា

វិទ្យាស្ថានជាតិអប់រំកាយនិងកីឡា ដើមឡើយមានឈ្មោះថា «សាលាមធ្យមសិក្សាអប់រំកាយ និងកីឡា» បានបង្កើតឡើងនៅថ្ងៃទី០៣ ខែកុម្ភៈ ឆ្នាំ១៩៨៨ តាមសេចក្តីសម្រេចលេខ៖ ១២សសរ របស់ក្រុមប្រឹក្សារដ្ឋមន្ត្រី ចំណុះក្រសួងឃោសនាការ និងវប្បធម៌ ដែលមានថ្នាក់ស្មើមន្ទីរនានាជុំវិញខេត្ត និងមានទីតាំងដំបូងស្ថិតអគារអាងហែលទឹក ក្នុងពហុកីឡដ្ឋានជាតិ ហើយទីតាំងថ្នាក់រៀន និងកន្លែងស្នាក់នៅរបស់គរុសិ​ស្ស ស្ថិតនៅអគារ​ផ្នែក​ខាង​ត្បូង​នៃអាងហែលទឹក។ 

មកដល់ខែកក្កដា ឆ្នាំ១៩៩២ សាលាមធ្យមសិក្សាអប់រំកាយ និងកីឡា បានប្តូរទីតាំងពីពហុកី​ឡដ្ឋា​នជា​តិ មកតាំងនៅសាលានយោបាយ វប្បធម៌ និងមុខជំនាញ (អតីតសាលាបឋមសិក្សា​តេជោដំឌិន) ដោយរក្សាទីលានហ្វឹកហាត់នៅពហុកីឡដ្ឋានជាតិដដែល។

នៅថ្ងៃទី២ ខែសីហា ឆ្នាំ១៩៩៣ សាលាមធ្យមសិក្សាអប់រំកាយ និងកីឡា បានប្តូរពីក្រសួងវប្បធម៌ និងសិល្បៈមកស្ថិតក្រោមក្រសួងកិច្ចការនារី យុវជន និងកីឡា និងបន្ទាប់មកបានប្តូរពីក្រសួងកិច្ចការនារី យុវជន និងកីឡា មកស្ថិតក្រោមការគ្រប់​គ្រ​ងរបស់ក្រសួងអប់រំ យុវជន និងកីឡារហូតដល់សព្វថ្ងៃនេះ។

ឈ្មោះវិទ្យាស្ថានជាតិអប់រំកាយ និងកីឡា បង្កើតឡើងនៅឆ្នាំ១៩៩៨ ចំណុះឱ្យ​អគ្គនាយកដ្ឋានយុវជន និងកីឡា នៃក្រសួងអប់រំ យុវជន និងកីឡា ហើយមានទីតាំងនៅពហុកីឡដ្ឋាជាតិដែលពេលនោះសាលាមធ្យមសិក្សាអប់រំកាយ និងកីឡា ថ្នាក់ស្មើនឹងការិយាល័យរបស់វិទ្យាស្ថានជាតិអប់រំកាយ និងកីឡា។

នៅឆ្នាំ២០០៣ ទើបផ្លាស់ប្តូរមកនៅភូមិលូ សង្កាត់ស្វាយប៉ាក ខណ្ឌឬស្សីកែវ រាជធានីភ្នំពេញ។

ប្រែក្លាយវិទ្យាស្ថានជាតិអប់រំកាយនិងកីឡាទៅជាគ្រឹះស្ថានឧត្តមសិក្សាដែលបណ្តុះបណ្តាលធនធានមនុស្សផ្នែកអប់រំកាយ និងកីឡា កម្រិតឧត្តម និងក្រោយឧត្តមសិក្សា ប្រកបដោយគុណភាព ប្រសិទ្ធិភាព និងឧត្តមភាពលើវិស័យអប់រំកាយ និងកីឡា។

ដើម្បីសម្រេចបានចក្ខុវិស័យខាងលើវិទ្យស្ថានជាតិអប់រំកាយនិងកីឡា មានបេសកម្មដូចខាងក្រោម៖

១-បណ្តុះបណ្តាល និងអភិវឌ្ឍធនធានមនុស្សក្នុងវិស័យអប់រំកាយ និងកីឡាប្រកបដោយគុណភាព

២-អភិវឌ្ឍហេដ្ឋារចនាសម្ព័ន្ធទន់ និងរឹងក្នុងវិស័យអប់រំកាយ និងកីឡាស្របតាមស្តង់ដាគុណវុឌ្ឍជាតិ

៣-បង្កើតគោលការណ៍លើកទឹកចិត្ត និងទាក់ទាញធនធានមនុស្សជំនាញដែលចាំបាច់សម្រាប់វិស័យអប់រំកាយ និងកីឡា

៤-លើកកម្ពស់កិច្ចសហប្រតិបត្តិការស្រាវជ្រាវ ផ្លាស់ប្តូររបកគំហើញ និងចំណេះដឹងក្នុងវិស័យអប់រំកាយ និងកីឡា

ដើម្បីអភិវឌ្ឍសមត្ថភាពប្រកួតប្រជែងរបស់គ្រូ និងនិស្សិត

៥-បង្កើនការស្រាវជ្រាវ និងបោះពុម្ពផ្សាយឯកសារស្រាវជ្រាវផ្នែកអប់រំកាយ និងកីឡា។